Smellið á myndirnar til að skoða fleiri myndir.

Landakotsskóli sendi þrjár sveitir til leiks á Íslandsmót barnaskóla- og grunnskólasveita helgina 12.-13. mars síðastliðinn. Skólinn sendi eina sveit til leiks í flokki 4.-7. bekkjar, og tvær sveitir í flokki 8.-10. bekkjar. Yngri nemendum bauðst að tefla einnig í eldri flokkunum. A-sveit Landakotsskóla í 8.-10. bekk hafði titil að verja en hafði ekki erindi sem erfiði þetta skiptið og lenti í 3. sæti eftir frækna baráttu. Snemma varð ljóst að baráttan var á milli Landakotsskóla, Lindaskóla og Vatnsendaskóla. Þessir skólar voru í algjörum sérflokki og einungis munaði hálfum vinningi á sigurliði Vatnsendaskóla (23.5 vinningar) og næstu tveimur (23 vinningar). Öll úrslit liðanna má nálgast á chess-results. Nemendur Landakotsskóla hafa sótt æfingar hjá Taflfélagi Reykjavíkur og Skákskóla Íslands og tekið virkan þátt í skákmótahaldi innanlands og jafnvel erlendis líka! 

Nemendur í bronzliði Landakotsskóla-A voru: 

1. Adam Omarsson 

2. Iðunn Helgadóttir

3. Jósef Omarsson 

4. Jón Loui Thoroddsen 

       vm. Muhammad Sanan Ijaz Sulehria

B-sveit Landakotsskóla hafði reyndar líka titil að verja (efsta B liðið) en varð að lúta í dúk gegn B-sveit Vatnsendaskóla sem einnig stóð sig gríðarlega vel. B-liðsmenn sýndu góða takta, ekki bara í sókn heldur líka í vörn, en afar áhugaverð pattstaða kom upp í skák Stefáns Borgars. Í skák er alltaf von þótt að kóngurinn verði ekki endilega mát. Þá verður hann bara patt í staðinn! 

Nemendur í Landakotsskóla-B: 

1. Stefán Borgar Brynjólfsson 

2. Jakob Rafn Löve 

3. Muhammad Rayan Ijaz Sulehria

4. Helgi Niels Gunnlaugsson 

       vm. Muhammad Sanan Ijaz Sulehria

19 lið tóku þátt í 3.-7. bekkjar mótinu og þar lenti Landakotsskóli í 6. sæti. Flottur árangur, og með aðeins heppilegri pörun hefði sveitin hæglega getað endað á palli, en í lokaumferðinni paraðist skólinn gegn sigursveit Vatnsendaskóla. Öll úrslit liðanna má nálgast á chess-results. Eins og sést tefldu þessir fjórir snillingar í báðum mótum, laugardag og sunnudag!: 

1. Jósef Omarsson 

2. Jon Loui Thoroddsen

3. Muhammad Rayan Ijaz Sulehria

4. Helgi Niels Gunnlaugsson

Það er skammt stórra högga á milli hjá skákliði Landakotsskóla en snemma í apríl verður Reykjavíkurmótið haldið og þar er að sjálfsögðu stefnt að sigri í allavega einum flokki, kannski tveimur! Það kemur bara í ljós, en það má samt ekki gleyma því að aðalatriðið er að hafa gaman að skákinni, þá fylgja góð úrslit!

                                               Gauti Páll Jónsson, skákkennari í Landakotsskóla

Íslenskuverðlaun unga fólksins í bókmenntaborginni Reykjavík 2021 voru afhent í Hörpu mánudaginn 21. febrúar. Sérhver grunnskóli tilnefnir nemendur til verðlaunanna, þrír nemendur frá Landakotsskóla fengu verðlaun: Ágúst Minelga Ágústsson 10. bekk, Anya Sara Ratanpal 7. bekk og Ragnheiður Hafstein 3. bekk.

Í tilnefningu Ágústar til verðlaunanna segir: Fyrir miklar framfarir í íslensku og afar góðan lesskilning á þungum texta, til dæmis Gísla sögu Súrssonar. 

Í tilnefningu Önju til verðlaunanna segir: Fyrir góðan skilning á íslensku sem kemur fram í tilfinningu hennar fyrir flóknum hugtökum í ýmsum námsgreinum. 

Í tilnefningu Ragnheiðar til verðlaunanna segir: Fyrir að hafa náð að tileinka sér ólíka nálgun í textaskrifum og hafa ótrúlega gott vald á tungumálinu þrátt fyrir ungan aldur. 

Allir 67 verðlaunahafarnir fengu viðurkenningarskjal og bókina Ljóðaúrval með ljóðum Jónasar Hallgrímssonar í samantekt Böðvars Guðmundssonar.

Afhending verðlaunanna er venjulega á Degi íslenskrar tungu, 16. nóvember en fór að þessu sinni fram á Alþjóða­degi móður­málsins 2022 þar sem fresta þurfti henni vegna heimsfaraldurs.

Við óskum Ágústi, Öngju og Ragnheiði innilega til hamingju með verðlaunin.