Kátakot er að detta í jólaföndrið með tilheyrandi glimmeri og saman límdum lófum. Okkur þykir gaman að föndra og ætlum við að reyna að gera eitthvað skemmtilegt föndur í hverri viku fram að jólum. Í þessari viku, 1.-4. desember 2015, föndruðum við kransa sem má sjá á meðfylgjandi myndum.
Við ætlum að halda áfram að vera dugleg að vera úti og því er mikilvægt að góð útiföt séu til staðar og jafnvel auka sokkar og vettlingar.
Fámennt en öflugt skáklið Landakotsskóla tók þátt í Jólaskákmóti TR og SFS, sunnudaginn 30. nóvember 2015. Tefldar voru 6 umferðir. Þrátt fyrir að lið skólans hafi ekki verið fullmannað, sem þýddi að í hverri umferð dæmdist sjálfkrafa af því 1 vinningur, gerði það þrjú jafntefli og sigraði í einni viðureign. Stóðu krakkarnir sig eins og hetjur og lentu í 10. sæti á mótinu.
Í vetur hafa farið fram vikulegar skákæfingar bæði í eldri og yngri flokki í skólanum og mátti sjá árangur þess á mótinu um helgina. Æfingarnar fara fram á frístundartíma og æfir 1.-4. bekkur á föstudögum kl. 14:10 og 5.-10. bekkur á mánudögum, kl. 14:10. Allir velkomnir.
Hægt er að skoða myndir sem Una mamma Iðunnar tók á mótinu í nýju myndaalbúmi í myndasafni Landakotsskóla. Myndasafnið má nálgast undir valstikunni Nemendur eða með því að smella hér.
Föstudaginn 27. nóvember 2015 var aðventunni fagnað í Landakotsskóla með því að nemendur og starfsfólk klæddist rauðu. Í morgunsöng inni á sal var sungið saman og kveikt á fyrsta aðventukertinu.
Hægt er að skoða myndir sem Hera umsjónarkennari í 1. bekk tók af samsöngnum í nýju myndaalbúmi í myndasafni Landakotsskóla. Myndasafnið má nálgast undir valstikunni Nemendur eða með því að smella hér.
