Starfslýsingar, annað starfsfólk

Stuðningsfulltrúar

• Vinnur í nánu samstarfi við umsjónarkennara og deildarstjóra stoðþjónustu;
• Er kennara til aðstoðar við að sinna einum eða fleiri nemendum sem þurfa sérstaka
  aðstoð;
• Getur eftir aðstæðum einnig sinnt öðrum nemendum í bekknum, m.a. til að kennari geti aðstoðað nemanda sem þarf séraðstoð og til að draga úr sérstöðu nemenda með sérþarfir;
• Hefur eftirlit með nemendum inni í kennslustofu í fjarveru kennara, þ.e. gætir þess að þeir vinni verkefni sem lögð hafa verið fyrir;
• Aðstoðar nemendur við að fylgja settum reglum um hegðun, umgengni og vinnubrögð;
• Vinnur eftir áætlun sem kennari hefur útbúið í samráði við sérkennara og foreldra;
• Ýtir undir færni og sjálfstæði nemenda í námi og daglegum athöfnum t.d. með því að hvetja þá til að gera sem mest sjálfir og hrósa þeim fyrir viðleitni í þá átt;
• Leitast við að styðja nemendur í félagslegum samskiptum innan og utan kennslustofu;
• Veitir nemendum félagslegan stuðning með því að hlusta á frásagnir og reynslu þeirra
  og spjalla við þá þegar aðstæður leyfa;
• Fylgir einum eða fleiri nemendum á ferðum þeirra um skólann, í frímínútum og vettvangsferðum og aðstoðar þá eftir þörfum.

Tölvuumsjónarmaður

• Sér um aðgang starfsfólks að innra neti skólans;
• Fylgist með nýjungum í skólastarfi, tengt upplýsingatækni, sækir námskeið, kynningarfundi og aðra fundi er tengjast starfinu;
• Fylgist með og kemur að undirbúningi samræmdra prófa í 4., – 7. og 9. bekk;
• Aðstoðar við fyrirlögn utanaðkomandi kannana;
• Heldur utan um tækjakost skólans tengt upplýsingatækni.

Nemendaráðgjafi

Hlutverk nemendaráðgjafa er að standa vörð um velferð allra nemenda, styðja þá og liðsinna í þeim málum sem snerta nám, líðan og framtíðaráform þeirra. Nemendaráðgjafi er talsmaður nemenda og trúnaðarmaður. Hann er bundinn þagnarskyldu um einkamál þeirra.

• Tekur viðtöl við nemendur að þeirra ósk;
• Trúnaðarmaður og málsvari nemenda;
• Er í samskiptum við foreldra og kennara þeirra nemenda, sem til hans leita, í samráði við viðkomandi nemendur;
• Hefur umsjón með könnunum sem þörf er á í þágu nemenda;
• Tekur á móti erindum frá nemendum, foreldrum þeirra, kennurum og stjórnendum skólans;
• Er ráðgefandi í málefnum nemenda með félagsleg og tilfinningaleg vandamál;
• Er ráðgefandi og til aðstoðar í eineltis- og forvarnarmálum;
• Situr í nemendaverndarráði og eineltisteymi skólans;
• Sér um valáfangann heimavinna;
• Tekur þátt í vinnu við að þróa forvarnaráætlun skólans.

Starfsmaður á bókasafni

• Sér um safngæslu og daglega umsjón;
• Sér um útlán bóka og annarra gagna;
• Sér um frágang bóka;
• Heldur röð og reglu á bókum í hillu;
• Sér um innkaup á bókum og öðrum gögnum;
• Sér um viðhald og viðgerð á bókum og gögnum.

Forstöðumaður frístundar

• Er verkstjóri og næsti yfirmaður starfsfólks, skipuleggur störf þeirra og heldur skrá yfir vinnutíma þeirra;
• Undirbýr og skipuleggur fundi með starfsmönnum frístundar;
• Heldur fundi með foreldrum/forráðamönnum barna sem eru að hefja skólagöngu og barna með sérúrræði;
• Hefur reglulega viðtalstíma fyrir foreldra/forráðamenn til þess að ræða málefni barns í frístund;
• Fylgist með því að nauðsynleg leikföng, búnaður og önnur gögn séu til staðar og leggur fram tillögur þar um til skólastjóra;
• Sér um frágang eftir vetrarstarfið og að eðlilegt viðhald fari fram á búnaði.

Starfsmenn frístundar

• Taka fullan þátt í öllu dagskipulagi innan frístundar;
• Skipuleggja dagskrá í samráði við aðra starfsmenn;
• Bera ábyrgð á hópastarfi eða klúbb;
• Aðstoða nemendur í leik og starfi;
• Efla virkni, ábyrgð, sjálfsmynd og sjálfstæði barnanna;
• Sjá um að frágangur húsnæðis sé viðunandi að vinnudegi loknum.

Skrifstofustjóri

• Sinnir daglegri afgreiðslu á skrifstofu skólans ásamt símsvörun;
• Svarar fyrir skólans hönd ýmsum fyrirspurnum eða vísar þeim til réttra aðila;
• Sér til þess að skilaboð berist til kennara og annarra starfsmanna;
• Tekur á móti pósti og kemur honum í réttar hendur;
• Tekur á móti og afhendir gögn sem berast inn í skólann;
• Pantar pappír og aðrar vörur sem tilheyra skrifstofuhaldi og fjölföldun á vegum skólans;
• Annast fjölföldun og póstsendingar;
• Sér um útprentun á nemendalistum, stundaskrám og vinnuskýrslum;
• Hefur yfirsýn yfir skráningu nemenda í skólann og miðlar til Reykjavíkurborgar;
• Sér um innritun og inntöku nýrra nemenda og raðar þeim í bekki í samráði við skólastjóra;
• Gengur frá gögnum um nemendur sem flytjast í aðra skóla;
• Hefur umsjón með skráningu barna í frístund og stendur skil á innheimtulistum þar að lútandi;
• Sér til þess að gögn varðandi nemendur og bókhald séu skráð og varðveitt og sér umsamskipti við bókara og endurskoðanda skólans;
• Annast forfallaskráningu vegna nemenda í Mentor;
• Sér um almenna vinnu tengda Mentor s.s. skráningu og umsjón með að nemenda- og starfsmannalistar séu réttir;
• Heldur utan um skráningu nemenda í mötuneyti;
• Er í samstarfi við verkefnastjóra forfalla fer yfir stöðu mánaðarlega og fer yfir vinnustunda og launalista;
• Sér um að á skrifstofu sé jafnan farið yfir reikninga skólans og fylgst með færslum;
• Sér um skjalavörslu skólans;
• Sér um viðhald fjölföldunartækja og aðstoðar starfsfólk við notkun þeirra;
• Afgreiðir strætómiða pantar leigu á rútum vegna sund- og vettvangsferða;
• Situr í persónuverndarteymi skólans;
• Vinnur rekstraráætlun með skólastjóra;
• Upplýsir skólastjóra reglulega um fjárhagsstöðu skólans og fylgist með að áætlanir séu í takti við daglegan rekstur;
• Fer yfir vinnustunda og launalista;
• Hefur þekkingu á viðeigandi kjarasamningum og hlutverki vinnuveitanda;
• Heldur utan um starfsmannagögn, það er skráir inn og viðheldur upplýsingum um starfsmenn;
• Sér um útborgun launa og launatengdra gjalda;
• Hefur umsjón með þeim greiðslum sem skólanum berast s.s. vegna skemmtana,
  nemendaferða og reksturs mötuneytis;
• Sér um pantanir á þeim gögnum sem nauðsynleg eru rekstri skrifstofunnar eða skólans að ósk skólastjórnenda;
• Annast mataráskrift starfsmanna;
• Móttekur greiðslur fyrir hina ýmsu þætti skólastarfsins;
• Sinnir móttöku skjala á skrifstofu skólans.

Umsjónarmaður skóla

• Sér um að húsnæði skólans og allur búnaður, ásamt skólalóð, séu ávallt í fullnægjandi
  ástandi;
• Sér um að húsnæðið sé opið við upphaf skóladags og ber ábyrgð á frágangi húsnæðis við lok skóladags;
• Hefur umsjón með lyklamálum til starfsmanna skólans og annarra sem þurfa þykir;
• Sinnir almennu viðhaldi skólahúsnæðis og lóðar og kallar iðnaðarmenn til verka;
• Hefur umsjón með ræstingu skólahúsnæðis ásamt því að sjá um skipulagningu hennar;
• Sér um innkaup á ræstivörum og öðru er varðar verksvið viðkomandi og einnig að
  gjaldaliðir ræstingar séu innan fjárheimilda;
• Er næsti yfirmaður skólaliða, skipuleggur og ber ábyrgð á störfum þeirra;
• Sér um að almennur tækjakostur skólans sé jafnan í lagi þar með talið móðurklukka og
  kemur þeim tækjum skólans sem biluð eru til viðgerðar;
• Hefur umsjón með því að salur og annað húsnæði sé undirbúið fyrir fundi, skemmtanir
  og aðrar þær uppákomur sem starf skólans kallar á;
• Hefur umsjón með öryggiskerfi skólans tengdu Öryggismiðstöð Íslands og Securitas;
• Annast eftirlit og viðhald á húsbúnaði;
• Sér um að hiti, lýsing og loftræsting hússins sé fullnægjandi og að kerfi þessi starfi rétt;
• Annast endurnýjun hvers konar ljósgjafa svo sem flúrpípa og pera;
• Sér um frágang sorps frá skólanum, hreinsun á rusli á skólalóð og flokkun sorps;
• Annast snjómokstur frá dyrum og af tröppum skólans;
• Fær verktaka til að sinna meiri háttar verkefnum eins og snjómokstri á bílastæðum,
  leiksvæðum og sanddreifingu eftir þörfum;
• Sér um að flytja húsgögn og tæki milli notkunarstaða í skólanum, þegar þörf er á;
• Sér um allar merkingar á rýmum innan dyra;
• Fer með umsjón öryggismála skólans og kemur að skipulagi neyðaráætlana.

Skólaliðar

• Reynir að leysa deilur og gætir þess að umgengnisreglur séu virtar;
• Halda skólanum hreinum og snyrtilegum;
• Aðstoðar nemendur ef með þarf við að ganga frá fatnaði sínum og gætir muna þeirra sem og klæða;
• Sér um framreiðslu á mat og frágang;
• Aðstoðar við uppröðun og tilfærslu á húsgögnum og tækjum þegar þörf er á;
• Þurrkar bleytu af göngum og heldur snyrtingum hreinum yfir daginn;
• Þrífur reglulega gólf á ákveðnu svæði.

Skólahjúkrunarfræðingur
Skólahjúkrunarfræðingur sinnir skipulagðri heilbrigðisfræðslu og nýtir þau tækifæri sem gefast til að fræða nemendur um flest það sem lýtur að heilbrigði og vellíðan. Áhersla er lögð á mikilvægi heilbrigðra lífshátta og að hver og einn ber ábyrgð á eigin heilsu og foreldrar á heilsu barna sinna.